जनकपुर टुडे

२०८१ फाल्गुन ८, बिहीबार १६:४०

महोत्तरी जिल्लाको रातु खोलामा मापदण्डविपरीत उत्खनन गरेको आरोपमा प्रहरीले दुई वटा एक्स्काभेटरसहित चालकद्वयलाई पक्राउ गरेको छ।

बर्दिबास नगरपालिका–९, पशुपतिनगरस्थित पथलैया खण्डको झोलुङ्गे पुल नजिकै अवैध उत्खनन गरिरहेको अवस्थामा इलाका प्रहरी कार्यालय बर्दिबासका प्रहरी नायब उपरीक्षक रेवती रमण पोखरेलको नेतृत्वमा प्रहरी टोलीले एक्स्काभेटर र चालकहरूलाई नियन्त्रणमा लिएको हो।

पक्राउ परेका चालकहरू सरोज कुशवाहा र विजय चौधरीलाई कानूनी कारबाहीको प्रक्रिया अघि बढाइएको प्रनाउ पोखरेलले जानकारी दिनुभयो।

स्थानीय आन्दोलित
रातु खोलामा मापदण्ड विपरीत उत्खनन भइरहेको भन्दै स्थानीयहरूले आन्दोलन गरेका थिए। नियमअनुसार झोलुङ्गे पुलबाट पाँच सय मिटर टाढाबाट मात्रै उत्खनन गर्नुपर्ने भए पनि पुलको दुई सय मिटरको दुरीमा उत्खनन भइरहेको अवस्थामा प्रहरीले हस्तक्षेप गरेको थियो।

यसअघि, बर्दिबास नगरपालिकाकी उपप्रमुख तारादेवी महतोको नेतृत्वमा अनुगमन टोलीले रातु खोलामा अनियमित उत्खनन भइरहेको भेटेको थियो। टोलीले छ फिटसम्म गहिरो उत्खनन, मध्यरातमा पनि दोहन भइरहेको र पुल नजिकैबाट नदीजन्य पदार्थ निकालिएको पाएको थियो। यसबारे सचेत गराउँदा पनि दोहन जारी रहेपछि प्रहरीको कदम आएको हो।

नियन्त्रण र कारबाहीको प्रक्रिया
प्रहरीले अवैध उत्खननमा संलग्न उपकरण र व्यक्तिहरूलाई नियन्त्रणमा लिई थप अनुसन्धान र कानूनी कारबाही अघि बढाएको छ। स्थानीयवासीले पनि खोला दोहन रोक्न कडा कदम चाल्न माग गरेका छन्।